Navenda Nûçeyan – Di nav krîz û zehmetiyan de ajansa me NÛJINHA, wek dengek pêşeng ji bo jinên li Rojhilata Navîn û Bakurê Afrîkayê derketiye holê. Ev ji bo çareserkirina pirsgirêkên jinan a di hemû çarçove û ezmûnên wan ên cihêreng de hatiye veqetandin. Ajansê ronî daye ser jiyana jinan a di saziyan, xebata giştî û mafên mirovan de, li kolanan û li kampên penaberan, li deverên şer û deverên pevçûnê, li bajarên dorpêçkirî, di siyaset û mîlîtarîzmê de, heta li dadgehan û gelek warên din ên xebatê. Ji damezrandina xwe ya di 6’ê Çileya 2021’an ve, ajansa me di nav krîzên mafên mirovan û ewlehiyê yên berdewam ên li Rojhilata Navîn ku ji hêla rojevên kapîtalîst ên Rojavayî ve hatine sînordarkirin û ji hêla rayedarên dewletê yên baviksalar ve hatine serdest kirin de, xebitiye. Van desthilatan krîzên navxweyî afirandine, ku bi hewldanên çewsandina hebûna jinan destpê kirine û tenê bi bidestxistina edaleta civakî bi dawî bûne.

Ev 5 sal in, ajansa me bê westan û bi biryardariyeke bê şik û guman xebat meşandiye da ku rewşa jinan baştir bike û dengê wan di warên cûrbecûr de bilind bike. Ev sal rêwîtiyek têkoşîn û berdewamiyê bûn. Hewl didin ku bibin platformek azad ku ronî dide ser pirsgirêkên jinan û êş û ezmûnên wan dike beşek ji bîra kolektîf û hişmendiya civakî. Ajansa me peyva xwe wekî alekê hilgirtiye, pirên çîrokan ava kiriye ku rabirdûyê bi niha ve girê dide û rê li ber pêşerojek dadmendtir vedike. Me ji jinan re cîhek peyda kiriye ku ew dikarin dîroka xwe binvîsin û beşdarên çalak bin, dûrî marjînalîzekirinê. Me ji hevgirtinê hêz girtiye û bi hevkariya sazî û dengên azadiyê li çar aliyê cîhanê toreke hêvî û berxwedanê ava kiriye.

Ajansa me, bi wêrekî bê şik, li dijî gotûbêjên medyayê yên zayendparêz, baviksalar û ji hêla dewletê ve hatî piştgirîkirin derketiye û hemü hewldanên ku jinan di rewşek duyemîn de datînin an jî wan biçûk dixin, eşkere kiriye. Damezrandina ajansê bersiveke jinan bû li hember marjînalîzekirina jinan a di medyaya serdest a mêran de û paşguhkirina pirsgirêkên wan, an jî kêmkirina wan ji bo wêneyên qurbanî an kelûpelan. Me alternatîfek pêşkêş kir: gotareke jinan a gerdûnî ku li dijî hişmendiya serdest a baviksalar ku armanc dike laşên jinan kontrol bike, xuyang, deng û jiyana wan diyar bike, disekine.

Ajansê ji 0’ê dest pê nekir; berovajî vê, wê li ser mîrateya ragihandina jinan a heyî ava kir, lê bi hêzek mezintir, bal kişand ser yekkirina tevgerên jinan û girêdana têkoşînên li seranserê sînoran. Ji Xezayê û berxwedana jinan di rûbirûbûna şer û dûrxistinê de bigre, heya Lîbya ku ji hêla hêzên navneteweyî ve hatiye perçekirin, ji Iraqê ku ji dagirkirina 2003’an vir ve di nav aloziyê de ye bigre, heya Misrê ku bi pirsgirêkên civakî û mafên mirovan re mijûl dibe, ji Sûriyê ku ji îdeolojiya Baasê ber bi îdeolojiya cîhadîst ve diçe bigre heya Afganistanê ku jin bi zilm û zordariya Talîbanê re rû bi rû dimînin û heya Îranê ku jinek ji ber nîşandana têlek porê xwe tê kuştin, ji Yemen û Sûdanê ku krîzên mirovî barekî giran li ser jinan datînin û di dawiyê de heya Kurdistanê ku jin têkoşînek dualî dimeşînin: parastina mafên xwe û parastina nasnameyek kolektîf ku ji ber perçebûnê tê tehdîtkirin. Ji şervanên jin ên ku bûne sembolên berxwedanê bigre heta têkoşînên wan ên rojane li dijî cudakarî û tundiyê, jin di dilê têkoşîna azadî û wekheviyê de ne.

Îro, ajansa me dikeve sala xwe ya şeşemîn û rêwîtiya xwe ya ber bi azadî û edaletê ve didomîne, bêyî ku ziman, ol, reng an baweriyê cuda bike. Em bawer dikin ku hemû gel û civak mafê jiyanek wekhev, azad û jinê di pêş de ne. Salên borî bingeha rêwîtiyek dirêjtir danîne ku tê de dengê jinan dê berdewam were bihîstin û pirsgirêkên wan dê di medyaya me û mîsyona me ya mirovî de di navenda wê de bimînin. Em destkeftiyên xwe pîroz dikin û ji bo pêşerojek dadmendtir û bi rûmettir ji bo jinan li herêma me û li çar aliyê cîhanê dixebitin.

Rêveberiya Ajansa Nûçeya a Jinan a NÛJINHA